Barin İnqilawining 16 Yilliqini Xatirilesh Üchün Xitayning İstanbulda Turushluq Bash Konsulxanisi Aldida Namayish Ötküzüldi

  2006-yili 4-ayning 5-küni Türkiyediki Sherqiy Türkistan medeniyet we hemkarliq jemiyitining teshkillishi bilen Türkiyediki Sherqiy Türkistanliq köchmenler xitayning İstanbuldiki bash konsulxanisi aldida namayish ötküzdi.

  Namayisschilar xitayning Sherqiy Türkistanda ötküziwatqan jinayetlirini eyipleydighan lozunka, Sherqiy Türkistanning dölet bayriqi we Türkiyening bayraqlirini kötürüshüp İstanbul boghizining shimal teripidiki Sariyer digen sahilgha jaylashqan xitay bash konsulxanisi aldigha yétip barghanda Türkiyening televiziye istansiliri we gezit-jornal muxbirliri namayishlarni ziyaret qilish üchün saqlawatqan idi.

  Xitayning bash konsulxanisi aldida aldi bilen İstanbuldiki Türkistan futbol kulubining mes'uli Mehmet Dönmes ependi Barin inqilabini we weten ichidiki xitayning fashistik qilmishlirini pash qilip, muxbirlargha bayanat berdi.

  Mehmet Dönmes ependining bayanatidin kéyin Enqerediki Sherqiy Türkistan medeniyet we hemkarliq jemiyitining reisi Xeyrullah Efendigil Barin weqesining kélip chiqish sewepliri, xitayning weqedin ilgiriki zulum we yolsizliqliri hemde Barin inqilawi partilighandin kéyin xitay tajawuzchiliri élip barghan qanliq basturushlarni bir qeder etrapliq bayan qilip, xitay tajawuzchilirining 1990-yildin hazirghiche yurt ichi we sirtida Sherqiy Türkistanliqlargha qaratqan dölet terrorluqi we deplomatik terrorluq qilmishlirini qattiq eyiplidi.

  Xeyrullah Efendigil bayanatida 2-apreldin 5-aprelghiche İstanbulda échilghan 4-nöwetlik xelqara demokratiyeni ilgiri sürüsh yighinigha Rabiye Qadir xanimning Türkiyening viza bermesliki sewebidin kelelmigenlikidin epsuslinidighanliqini, Türkiye hökümitining xitay tajawuzchi hökümitining deplomatik bésimigha bash égip Rabiye Qadir xanimgha viza bermigenlikini qattiq eyiplidi.

  Xitay tajawuzchilirining İstanbuldiki bash konsulxanisi Asiya qit'esi bilen Yawropa qit'esini ayrip turidighan İstanbul boghizidiki Sariyerge jaylashqan bolup, xitay tajawuzchilirining niyitige oxshash qara derwaza aldida Sherqiy Türkistanliqlar ay-yultuzluq kök bayraqni kötürüp bérip ayipligende we bayanat bergende xitay deplomatlar reswaliqi üchün chashqandek inlirigha kiriship ketken idi. Türkiyening TRT, TGRT, ATV qatarliq televiziye istansiliri we gezit-jornal idariliri muxbirliri ziyaretke kelgen bolup, nechche yil ün-tüzsiz qalghan Sherqiy Türkistanliqlarning sadasini séghinip qalghandek bashtin-axir ziyaret qilishti. Türkiyening paytexti Enqere we Qeyseri qatarliq bashqa sheherliride xitaygha qarshi namayishlar üzülmey élip bérilmaqta. Emma İstanbuldiki Sherqiy Türkistan teshkilatliri Türkiye hökümiti namayish qilishni cheklimigen bolsimu, yéqinqi bir nechche yilda namayish qilmighan.

  İstanbul- Sherqiy Türkistan köchmenliri eng köp olturaqlashqan "Dunyaning paytexti"-dep Türk milliti teripini qilidighan chong sheher bolup, paaliyet élip bérishqa eplik, qatnishi qolayliq, paaliyetning tesirimu téz tarqaydighan jay. Xeyrullah Efendigil ariliqni yiraq körmey lozunka, kök bayraq qatarliqlarni İstanbulgha élip kélip İstanbuldiki qerindashlarni teshkillep bu qétimqi namayishni ongushluq ötküzdi. Türkiye mezlumlar jemiyitining İstanbul shöba bashliqi Mustafa Erjan namayishni yéqindin qollidi we nutuq sözlep, Sherqiy Türkistanning heqqaniy dawasini dawamliq qollaydighanliqini bildürdi.

  Xitayning İstanbuldiki qara derwaziliq bash konsulxanisi aldida namayishchilar ghezep-nepretlirini ipadileshti. Namayishqa Sherqiy Türkistanliq ösmürlermu kelgen idi.

  Xitay tajawuzchi hökümitining depne murasimi üchün Sherqiy Türkistanliq namayishchilar xitay konsulxanisigha qara chembirek teqdin qildi. Bu qara derwaziliq deplomatik terrochi organ, İstanbulgha qandaqtur Türkiye-xitay dostluqini yaxshilash yaki Türk-xitay xelqlirining dostluqini kücheytish we yaki dunya ténchliqigha töhpe qoshush üchün kelgen bolmastin, Türkiye jumhuhriyitining ottura sherq we Amerika-Yawropa bilen bolghan munasiwitidin paydilinish, Türk millitining ichki sirlirini oghurlash, Türkiyening Sherqiy Türkistan siyasitini öginish we uning'gha tayinip Türkiyege Türk millitige taqabil turush, düshmenlik qilish üchün axbarat toplash, Sherqiy Türkistan köchmenliri ichidiki imansiz, iradisiz, satqun kishilerni hemde Türk millitining düshmenlirini yallap Sherqiy Türkistanning musteqilliq kürishining yuquri dolqun'gha kötürülishining aldini élish üchün ighwagerchilik, aghdurmichiliq, deplomatil terrorluq, yoshurun öltürüsh weqelirini planlash, jasusluq qilish, Türkiyediki Kurt mesilisidin paydilinip Kurtlarning terrorluq teshkilati bolghan PKK gha destek bérip Türkiyede terrorluq heriletlirini peyda qilish qatarliq jinayetler bilen shughullinidighan jasusluq orginidur.

  Hiliger xitaylar Ürümchidiki "aptonom rayonluq tashqi ishlar idarisi muhim mehmanlar bashqarmisi"da ishleydighan Dostan atliq qazaq ghalcha memurni İstanbuldiki bash konsulxanisining viza bölimige"muawin bashliq" qilip teyinlep iwertken bolup, Dostan xitay tajawuzchi hökümitining buyruqi boyiche héty-bayramlarda İstanbuldiki Qazaq köchmenlerning teshkilarlirigha bérip "pul iane qilish", "weten'ge qaytip ketinglar, qarshi alimiz, her biringlargha yer, öy-mülük we 50 ming dollar pul bérimiz", "Mawzeydong öldi, hazirqi JKP xitayliri perishtilerdek aq köngül, teqwa, weten ichidiki xelqimiz ajayip bayashat, xatirjem, semrip yaghliri éqip ketti.." digendek aldamchiliq we bölgünchilik qilmishliri bilen shughullanmaqta.Undin bashqa İstanbuldiki Sherqiy Türkistanliq köchmenler ichidiki bir qisim kishilerni xitaygha "sayahetke teklip qilish", "dengiz boghizida ötküzidighan xitayning dölet bayrimini we chaghanni tebrikleydighan ziyapet" lirige teklip qilishtek " mehmandostluq" paaliyetliri bilenmu shughullanmaqta.

  Qerindashlarning hushyar bolushini, düshmenning qiltiqigha chüshmesligini tileymiz we Allahtin insap, iman we insaniy wijdan tileymiz.

Qaraxan

2006-yili 4-ayning 5-küni